Rabitəbank 5 milyon dollar həcmində istiqrazlarını xarici bazarda yerləşdirilməsini başa çatdırıb Rabitəbank ASC faizli, sənədsiz, təminatsız istiqrazlarının Latviya bazarında yerləşdirilməsini uğurla başa çatdırmışdır. İstiqrazların ümumi məbləği 5 milyon dollar, dövriyyə müddəti 3 il, faiz dərəcəsi illik 13,5% təşkil edir. Yerləşdirmənin təşkilatçısı Baltik dövlətlərində bank xidmətləri və qiymətli kağızlar bazarının aparıcı iştirakçısı olan Parex Banka (Latviya) çıxış etmişdir. Rabitəbank istiqrazlarına Latviyanın maliyyə institutları, habelə beynəlxalq sərmayəçilər tərəfindən böyük maraq göstərilmişdir.

Rabitəbank İdarə heyəti sədrinin müavini Elçin Qədimov istiqrazların uğurla yerləşdirilməsini yüksək dəyərləndirmiş və bildirmişdir ki, beynəlxalq maliyyə bazarlarında müşahidə olunan son hadisələrə baxmayaraq, istiqrazların yerləşdirilməsinin müvəffəqiyyətlə həyata keçirilməsi beynəlxalq sərmayəçilərin Rabitəbank-a və bütövlükdə Azərbaycan bazarına olan marağının və etibarının nəticəsidir.

Rabitəbank 1993-cü ildən fəaliyyət göstərir. Cari ilin 9 ayının maliyyə yekunlarına əsasən, bankın aktivləri 69 milyon manat, kredit portfeli 39 milyon, depozit portfeli 32 milyon manat təşkil edir. Bu günə 5 filial Bakıda, 10 filial regionlarda olmaqla ümumilikdə Rabitəbank-ın 15 filialı fəaliyyət göstərir.