Rabitəbank İslam İnkişaf Korporasiyası ilə yeni kredit sazişi imzalayıb Noyabrın 30-da Rabitəbank ASC və İslam İnkişaf Korporasiyası (ICD) arasında 1 milyon dollar həcmində kredit xəttinin ayrılmasına dair yeni kredit sazişi imzalanmışdır. Yeni kredit xəttinin müddəti birinci ili güzəştli dövr olmaqla 6 il təşkil edəcək və ölkədə kiçik və orta sahibkarlığın maliyyələşdirilməsinə yönələcək. Bununla da İCD tərəfindən banka ayrılmış kreditin ümumi həcmi 2,1 mln. dollara çatmışdır.

Rabitəbank-ın baş ofisində keçirilən imzalanma mərasimində ICD-nin icraçı direktoru Xalid əl-Abudi kredit xəttinin genişləndirilməsini Rabitəbank-la uğurlu əməkdaşlığın nəticəsi kimi dəyərləndirmişdir. Rabitəbank-ın Müşahidə Şurasının sədri Zakir Nuriyev də Bankla maliyyə təşkilatı arasında uğurlu əməkdaşlığın davam etməsindən məmnunluğunu bildirərək yeni investisiyanın bankın qarşısında geniş inkişaf perspektivləri açdığını vurğulamışdır.

Azərbaycanda qeyri-neft sektorunun inkişafına yönələn kreditlər çərçivəsində ölkənin bir sıra etibarlı, nüfuzlu bankları ilə əməkdaşlıq edən İslam İnkişaf Korporasiyası ilə Rabitəbank arasında ilk kredit sazişi 2004-cü ildə imzalanmışdır. Rabitəbank beynəlxalq maliyyə institutları ilə əməkdaşlığa 1998-ci ildən başlayıb və hazırda Bank ICD ilə yanaşı Beynəlxalq Maliyyə Korporasiyası (IFC), Avropa Yenidənqurma və İnkişaf Bankı (EBRD) ilə əməkdaşlıq edir.

Rabitəbank 1993-cü ildən fəaliyyət göstərən kommersiya bankıdır. Cari ilin 9 ayının maliyyə yekunlarına əsasən, bankın aktivləri 69 milyon manat, kredit portfeli 39 milyon, depozit portfeli 32 milyon manat təşkil edir. Bu günə 5 filial Bakıda, 10 filial regionlarda olmaqla ümumilikdə Rabitəbank-ın 15 filialı fəaliyyət göstərir.