“Rabitəbank” ASC-nin Səhmdar Kapitalının Gəlirliliyi Siyasəti Bankın kapitalın səmərəli idarə olunması, səhmdar dəyərinin qorunması və uzunmüddətli maliyyə dayanıqlığının təmin edilməsi üzrə əsas yanaşmalarını müəyyən edir. Siyasət kapital gəlirliliyinin optimal səviyyədə saxlanılmasını, kapital resurslarından effektiv istifadəni və risklə gəlirlilik arasında balansın qorunmasını əsas götürür. 

Əsas prinsiplər

• Davamlılıq – kapital gəlirliliyinin təmin olunması qısamüddətli nəticələrdən deyil, Bankın uzunmüddətli və dayanıqlı inkişaf hədəflərindən irəli gəlir. 
• Risklərin nəzərə alınması – kapital gəlirliliyinin artırılması Bankın risk iştahası və prudensial tələblər nəzərə alınmaqla həyata keçirilir, izafi risklərin qəbulunu təşviq edən yanaşmalara yol verilmir. 
• Səhmdar dəyərinin qorunması və artırılması – kapitaldan əldə olunan gəlirlilik səhmdarların uzunmüddətli maraqlarına və Bankın davamlı inkişafına xidmət edir. 
• Balanslı mənfəət bölgüsü – əldə olunan mənfəətin bölüşdürülməsi zamanı səhmdar maraqları, kapitalın adekvatlığının qorunması və Bankın inkişaf ehtiyacları arasında tarazlıq təmin edilir. 

Bank kapital gəlirliliyinin artırılmasını məhsul və xidmətlərin inkişafı, əməliyyat effektivliyinin yüksəldilməsi, rəqəmsal imkanların genişləndirilməsi və kapital resurslarından məqsədyönlü istifadə vasitəsilə həyata keçirir. Siyasətin icrası risklərin məsuliyyətli idarə olunması, korporativ idarəetmə prinsipləri və Bankın daxili nəzarət mexanizmləri çərçivəsində təmin edilir.

“Rabitəbank” ASC-nin Dividend Siyasəti Bankın maliyyə dayanıqlılığının qorunması, strateji məqsədlərinin dəstəklənməsi və səhmdarların maraqlarının balanslaşdırılması prinsipləri əsasında formalaşdırılır. Siyasətin əsas məqsədi dividend ödənişləri ilə bağlı şəffaf, aydın və ədalətli yanaşmanın təmin edilməsi, səhmdarların hüquqlarının qorunması və Bankın uzunmüddətli inkişafına töhfə verən qərarların qəbul edilməsidir.

Dividend siyasəti aşağıdakı əsas prinsiplərə əsaslanır:

• Bankın gəlirliliyinin artırılması, kapital mövqeyinin gücləndirilməsi və investisiya cəlbediciliyinin dəstəklənməsi; 
• Dividend qərarlarının şəffaf və ədalətli meyarlar əsasında qəbul edilməsi; 
• Bütün səhmdarların qanunvericiliklə müəyyən edilmiş bərabər hüquqlarının təmin olunması; 
• Dəyişən biznes mühiti və Bankın strateji prioritetləri nəzərə alınmaqla dividend siyasətinin davamlı təkmilləşdirilməsi.

Dividendin elan olunması və ödənilməsi

“Rabitəbank” ASC-də dividendlərin elan olunması və ödənilməsi qanunvericiliyin tələbləri, Bankın maliyyə vəziyyəti və strateji prioritetləri nəzərə alınmaqla həyata keçirilir. Dividend ödənişi ilə bağlı qərarlar səhmdarların hüquqları və Bankın davamlı fəaliyyətinin təmin edilməsi prinsipləri əsasında qəbul edilir.
Dividend məbləğinin müəyyən edilməsi zamanı Bankın maliyyə nəticələri, kapital adekvatlığı, inkişaf ehtiyacları və risklərin idarə olunması amilləri nəzərə alınır. Dividend ödənişləri üzrə qərarlar SÜY tərəfindən qəbul edilir və qanunvericilikdə müəyyən edilmiş tələblərə uyğun şəkildə  həyata keçirilir.

Dividendlərin ödənilməsinə məhdudiyyətlər

“Rabitəbank” ASC-də dividendlərin elan edilməsi və ödənilməsi zamanı qüvvədə olan qanunvericiliyin tələbləri, Bankın maliyyə dayanıqlılığı və kapital mövqeyi nəzərə alınır. Dividend ödənişləri Bankın öhdəliklərini yerinə yetirmək imkanına, kapital adekvatlığına və davamlı fəaliyyətinə mənfi təsir göstərməməlidir.
 

“Rabitəbank” ASC-nin Mükafatlandırma Siyasəti Bankda ədalətli, şəffaf və məsuliyyətli mükafatlandırma yanaşmasının əsas prinsiplərini müəyyən edir. Siyasət əməkdaşların motivasiyasının, peşəkar inkişafının və Bankın strateji məqsədlərinə yönəlmiş fəaliyyətinin dəstəklənməsinə xidmət edir. Mükafatlandırma sistemi korporativ idarəetmə, risklərin səmərəli idarə olunması və etik davranış prinsipləri əsasında formalaşdırılır, dayanıqlı performansa, keyfiyyət göstəricilərinə, uzunmüddətli nəticələrə və Bankın inkişafına verilən töhfəyə əsaslanır. Mükafatlandırma sistemi əməkdaşların peşəkar inkişafını, müştəriyönümlü fəaliyyətini, komanda işini və məsuliyyətli qərarverməsini təşviq edən maddi və qeyri-maddi motivasiya alətlərini əhatə edir.

“Rabitəbank” ASC-də mükafatlandırma yanaşması aşağıdakı əsas prinsiplərə əsaslanır:

• Strateji məqsədlərə uyğunluq 
• Ədalətlilik və şəffaflıq 
• Məsuliyyətli risk yanaşması 
• Uzunmüddətli dəyərin yaradılması 
• Etik və obyektiv yanaşma  

Mükafatlandırma siyasətinin tətbiqi Bankın daxili prosedurları və tənzimləyici tələblər nəzərə alınmaqla həyata keçirilir, onun effektivliyi isə müvafiq idarəetmə strukturları tərəfindən mütəmadi olaraq nəzərdən keçirilir.