Bütün elanlar
Qadın sahibkarların biznes bilikləri artırılır
29 Mart, 2023

Qadın sahibkarların biznes bilikləri artırılır

Aprel ayında başa çatacaq layihə çərçivəsində üç ən yaxşı layihənin müəllifinə biznes ideyasını reallaşdırması üçün maliyyə dəstəyi göstəriləcək.

Kiçik və Orta Biznesin İnkişafı Agentliyi (KOBİA) və “Rabitəbank” ASC-nin təşkilatçılığı, Azərbaycan Sahibkarlar (İşəgötürənlər) Təşkilatları Milli Konfederasiyası,  Azərbaycanda Qadın Sahibkarlığının İnkişafı Assosiasiyası və “Marsol Group”un dəstəyi ilə keçirilən “Biznesdə qadınların gücü” layihəsinə cəlb edilmiş 23 qadın sahibkarın biznes biliklərinin artırılması üçün fevral və mart aylarında müxtəlif təlimlər keçirilib, sahibkarlara dəstək və xidmət göstərən dövlət qurumlarının nümayəndələri ilə görüş və Lənkəran şəhərinə təcrübə səfəri təşkil edilib. Layihənin məqsədi qadın sahibkarların ölkə iqtisadiyyatındakı rolunun və işgüzar fəallığının artırılmasına dəstək olmaqdır.

Təlimlər zamanı qadın sahibkarlar korporativ mədəniyyət və idarəetmə, məhsul, onun təqdimatı və satışı, “Startap” şəhadətnaməsinin üstünlükləri, liderlik, eləcə də biznesin qurulması və inkişaf etdirilməsi üçün zəruri olan digər mövzularda məlumatlandırılıblar. Təlimçi və ekspertlər Zahid Adıgözəlov, Sakit Səmədov, Hikmət Əliyev və Müjgan Əliyevanın iştirakı ilə keçirilmiş tədbirlərdə qadın sahibkarlarla mövzu ətrafında fikir mübadiləsi aparılıb, onları maraqlandıran suallar cavablandırılıb və praktik məsləhət xidməti göstərilib.

Həmçinin fevralda qadın sahibkarların biznes subyektlərinə dəstək və xidmət göstərən dövlət qurumlarının nümayəndələri ilə görüşləri, mart ayında isə Lənkəran rayonunda yerləşən çay plantasiyasına təcrübə səfərləri təşkil olunub.

Qeyd: Aprel ayında başa çatacaq “Biznesdə qadınların gücü” layihəsinin iştirakçılarının təqdim edəcəyi 3 ən yaxşı layihənin maliyyələşdirilməsinə dəstək göstəriləcəkdir (1-ci yer 5000 manat, 2-ci yer 3000 manat və 3-cü yer 2000 manat).